رواية شرف الأخلاق ـ للروائي طارق اللبيب

هناك في البيت البنات بتكلمن . وفرحانات . واصواتهن ارتفعت .. والحاجة ام شرف سمعت طرف من الكلام .. طبعا هي ما عندها اي خلفية عن موضوع شرف مع انعام .. قامت جات قالت ليهن انتن بتتكلمن عن شنو؟
تيسير قالت ليها مافي حاجة يا امي .. قالت ليها طيب شنو الكلام الانا بسمع فيهو ده ؟ ..
قالت ليها سمعتي شنو يا امي؟ .. قالت ليها سمعتكن .. قلتن : انعام مناسبة لشرف.. وشرف مناسب لانعام .. ولايقين على بعض ..انعام دي منو يا تيسير .. او عا يكون انعام طليقة راجلك؟
قالت ليها ياها زاتها يا امي ..
قالت ليها والله عجايب.. وانا اخر من يعلم موش كدي؟ .. وبعدين خبارو شرف ولدي بقع فوق فضال الرجال ..
قالت ليها يا امي شرف بحبها .. وشنو يعني فضال الرجال .. انا زاتي ترا عرست فضال النسوان .. مش انا زوجي مطلق ؟؟
قالت ليها الراجل ما زي المراة .. والمراة المطلقة ما زي الراجل المطلق ..
هنا نعمة قالت ليها يا خالتي .. الموضوع ما موضوع مطلقة وفتاة .. المهم اخلاقها .. المهم ادبها وسلوكها وطبايع اسرتها ..ونحن كلنا بنعرف انعام كويس .. قالت ليها انتي؟ انتي يا نعمة ؟؟ بتعرفيها من وين .. انتي جيتي ليك اربعة يوم ..
قالت ليها دي تساليط بنات الزمن يا خالتي ههه ..
والاهم من كدا يا خالتي .. انو نحن كلنا عايزنها .. وشرف داير يموت فوقها ..وياسين عارف وموافق بالموضوع .. وهي كمان بتريد شرف اكتر من عيونها ..وكانت في عراقيل في الموضوع .. نحن قلنا نحلحل العراقيل ونجي نكلمك بكل الحاصل .والحمد لله العراقيل اتحلحلت وحكو ليها القصة ..
الحجة قالت ليهم اسمعن يا بنات .. كدي خلوني اتكلم معاكم بالعقل .. كدي .. كيف يعني شرف يعرس طليقة راجل اختو ..
والاسر بعدين تتداخل .. والمراة تشوف طليقها حايم قدامها .. ويتلاقو في كل مناسبة ..
تيسير قالت ليها اطمنك يا امي .. قدورة راجلي من يوم المشكلة الحصلت بين امو وبين انعام .. تاني بقى يشوف الموت ما يشوفها .. ومرقت من نفسه كلو كلو .. وبقى ما بحب يجيب سيرتها حتى ..فانا ابدا ما مقلقة من الحتة دي .. لاني واثقة من محبة زوجي ..وواثقة اكتر من محبة انعام لشرف ..
قالت ليها الموضوع ده انا ما مريحني كلو كلو .. ومستحيل اوافق عليهو ..
تيسير قالت ليها لو دايرة تفقدي ولدك .. اقيفي في طريقو في الموضوع ده ..
نعمة قالت لها .. وحات الله يا خالتي شرف دايز يموت بلاشهادة فوق البنية دي ..
وعاد اكان ابيتي لينا .. انا براي تاني البيت ده ما بجيهو .. وانتي تاني لاك خالتي ولا حاجة .. وبرجع الجزيرة وحات ربي تاني ما بجي .
الحاجة قالت ليها يا نعمة ما تهددوني .. انا عنيدة وراسي قوي ..
ودخلت خلتهن متوترات توتر شديد ..
شيماء قالت ليهن دي حالة شنو يا اخوانا .. بعد ما ظبطنا الامور وطرشقنا الخطوبة ..
التعب ده كلو يروح فشنك ؟؟ بالونه ونفست.؟
تيسير قالت ليها .. انتي اصبري .. امي دي براك بتشوفيها .. موضوعها ساهل ..
اها شيماء ودعتهم وقالت ليهم انا بتابع معاكم الموضوع .. ورقم تلفوني معاكم ..
(التلفون اب خيطاً بمبي ههه)..
نعمة وتيسير قاعدات الاتنين متمحنات .. نعمة قالت لي تيسير عندك لبانة؟
قالت ليها لبانة؟؟ دايرة بيها شنو اللبانة .. قالت ليها انا لمن اكون متوترة ما بعرف افكر الا امدغ لي حاجة ..
قالت ليها : لوكي ليك ورقة .. ولا كيس وفكينا .. ههه ..
قالت ليها انا متأكدة لو جبتي لي لبانة بطلع ليك بخطة تخلي خالتي توافق ..
قالت عليك الله يا نعمة خليني اركز .. قالت ليها خلاص سكتا ياريت تركيزك يجي بفايده ..
اها طبعا الزمن جرا والواطة بقت الساعة ماشة لخمسة مساء وناس شرف بيغادي في الفرن خلصو شغل وحاسبو العمال .. وقال ليهو يلا سريع نغشى البيت ..
ناخد حمام وتلبس ليك لبس يليق بالمقام ويلا نمشي ..
قال ليهو جاهزين واتحركو جو البيت وسريع ختو ليهم الغدا .. اتغدو واتجهزو للمرقة ..
شرف دخل لامو .. لقاها براها ..
قال ليها نحن ماشين لينا لي موضوع .. داير دعواتك ربنا يثبتني .. لاني نفسياتي محطمة .. وماشي بس عشان ياسين اخوي ..
قالت ليهو موضوع شنو ؟ قال ليها الحقيقة يا امي انا كنت عايز لي واحدة من بنات الحلة .. وربطت عليها امل حياتي .. وما اتوفقت .. واليومين الفاتن ديل انا كنت محطم من جميع الجوانب .. بس مافي زول حاسي بي الا ياسين .. وياسين عايز يتزوج .. ورغبتو نتزوج مع بعض .. وهو هسي مرشح لي واحدة في ابروف ماشي اشوفا وبطني طامه .. انا ما عندي حظ يا امي ...
وعيونو رقرقن .. امو وكت شافتو بكى .. قالت ليهو كرعلي يا يمة اتاريك انت ممكون وصابر ..انا ابقى ما ام لو خليتك تمشي ابروف .. !!
قال ليها ليه يا امي؟ قالت ليهو تمشي ابروف وانعام منتظراك ..؟؟!!
شرف اتخلع لمن طير عيونو ..
قالها انعااام؟ وانتي الكلمك بانعام منو ؟
قالت ليهو عرفت انت مالك .. البشارة يا شرف .. ربنا بريدك ..
الزول الخطب انعام من شمبات .. فسخ الخطوبة .. والسبب نعمة اختك وشيماء ..
شرف قعد في الواطة بالدهشة والخلعة ..
قالت ليهو حكو لي البنات هسي كل حاجة ..
تعالن يا بنات .. اخوكن العوير ماشي يشوفلو واحدة من ابروف ..
وانعام راجياهو ..
وجن اخواتو وحكو ليهو الحاصل وشرف ده قعد يكورك زي المجنون ..
اول مرة يتهابل كدي .. لامن ياسين جا جاري من بيغادي ..
شرف جرى عليهو وحضنو بدون ما يوعي ..
وقال ليهو بارك لي يا الغالي .. بارك لي ..
ومشو في نفس اليوم داك .. شرف وياسين ونعمة وتيسير .. وشيماء حصلتهم في الشارع وخطبو انعام لي شرف .. وكانت فرحة ليس لها مثيل فرحة .. وانا زاتي فرحت
وياسين وشرف اتزوجو الاتنين بعد 21 يوم .. وناس الجزيرة كلهم جو وحضرو العرس
وخطبو نعمة لي خالد ود هاجر .. وزواجها بعد العيد ..
واليومين ديل شيماء كل يومين تلاتة تركب تمشي السوق العربي ..
وبقت مكسرة في الراجل الطويل اب حساً غليد داك العندو مكتب الخدمات ..
وشرف ربنا وفقو . كان سبب في انو يجمع بين اسرة زوجتو انعام .. واسرة قدورة ..
ويصلح بينهم .. بدون مصاهرة ولا نسب .. بس لعلاقتو بالجانبين ..
وعاشو الحب حقيقة وبالصفات اتفانو ..
وختو السنة للحـــب الوثيقة اركانو ..
اصلو الزول وكت يخدم يساعد اخوانو..
ربنا بسعدو ويصلح امورو وشانو ..
..
ولكم تحياتي وانا سعيد بقراءتكم لهذه التحفة ..
واعشق هذه العيون التي تعانق حروفي ..
اخوكم طارق اللبيب ..