الحاج ودالقاسم يرثي الأزرق

رحل مقنع وليات القبائل كافة
رحل الـ إيدو لينة وللعشير مي جافّة
رحل ركّازة الناس الـ قلوبُن خافّة
فقدك حار على الناس يا مُلاح الحافة
***
رحل عشّاي ضيوف الهجعة نُص الليل
رحل مُقنَع ولياتنا الـ بِعدْل الميل
رحل الما بيعد فرق الكتير وقليل
رحل فارس قبيلتو الباقي ليها دليل

فاقدين البجيب العيش كتير مجّان
فاقدين البقنّع ديمة في النسوان
فاقدين البكافي السيَّة بالإحسان
فاقدين البشنِّق فيها مو خجلان

فاقدين البنعرض فوقو ما اتمهلنا
فاقدين البيتفقدنا ما هملنا
فاقدين القدُر ما نسوي بتحملنا
فاقدين البشِّق حنك البجي يكاتلنا
***
فاقدين البنعرض فوقو عينَّا قوية
فاقدين البكفي الضيف مرارة وشية
فاقدين البقـنِّـع كل بطحانية
فاقدين البفك مربوقنا من غير دية
***
فاقدين العمل مستشفى داوّى مرضنا
فاقدين الفَتَح تعليمنا قرّا ولدنا
فاقدين الـ بِنْجْدَع فوقو يقضى غَرَدْنا
فاقدين الـ قَبُل باقِيلْنا ضو لبلدنا