ما جاب المطر بنزين

من طرف Admin الإثنين مارس 02, 2015 5:31 pm

ما جاب المطر بنزين
قصيدة جديدة

شعر : هاشم صديق

ماجاب المطر بنزين
ولا سوت خُطَب مولانا ( تاج الدين )
بلد طيبة وقوم آمنين
ولا ارتاحت جيوب الناس
في الطابونة والكنتين .
.............

قعدتو تبولو في ريسينا
كم حولاً فات في العد
عدد عشرين
خليتو البلد فقران
سواد الأمة بات محتاج
وجُل الشعب صار مسكين
...............
ما شفنا يا ( مولانا ) يا ( بشبش )
إسم إسلامي إسلامين
ولا شفنا الصلاح أفعال
ولا قامت شريعة ودين
سويتو البنوك (كعبة)
و (هرولتو) بين ( كافوري ) و ( البدعة )
وبين ( السفة) ( واللبعة )
جيتو نحاف ** تقول أطياف
بقيتو كروش ** شحم وقروش
وقاطرين من ورا ** الجعبة
وما فيكم ءاسم (صالح) ولا صالحين
.................
يا مولانا يا (بشبش) وتاج الدين
انحنا ولاد بيوت الطين
ما دخلت بيوتنا (البيتزا)
ولا عارفين شنو (الهوت دوق)
ولا (اتحنكشنا) (بالمصاصة)
ءانتو المصوا دم الشعب
ما خليتو قطرة دم
وانتو السُقتو بي حالو
وطن للجوع ونار الهم
وانتو البعتو ** خير الأمة ** شرف الذمة
لما خجل عديل من روحوحتي الذم
وانتو الجيتوا بس للم وكم في كم
وقهر الأمة والتنكيل
...................
يا (بشبش) هو ده التأصيل ؟
وجنس (البيتزا) مش ايطالي
ما (جعلي) ولا شايقي
(والهوت دوق) موش نصراني ؟
ولا كمان صبح سوداني؟
ساي بالغش والمصاصه يا حصحاصة
ده الاعجاز
وده الانجاز ؟!
..............
مما جيتو اتباع الشرف في السوق
عكّرتو البحر بالغم
وكتْلتو العباد بالهم
وسطرتو الظلم بالدم
رقّيتو الرمم لي فوق
زرزرتو الرقاب بالطوق
ولغيتو الخجل والذوق
...............
يا (بشبش) أمير الدين
نحن ولاد بيوت الطين
كنا عُزاز ومستورين وشبعانين
نعوس الكسرة فوق الصاج
وبينا العُشرة والنفاج
ونكرم ضيفنا والمحتاج
لا (هوت دوق) ولا (بيتزا) ولا (مصاصة)
شبعنا عشقنا اللقمة ( بالتقلية ) والقراصة
بالدمعة وبالسمنة وسَلطةْ روب كمان خاصة
...............
قَبُل ما تجونا ما كنا ناس فاجرين
ولا كفار وعارفين الفروض والدين
انتو الجيتو كضابين وسفاحين وسراقين
نشّفتو البلد والريق
وتجار دين لا شوف سبحة لا إبريق
ما زدتو البلد انجاز ولا ميزة
غير (مصاصة) أو ( بيتزا )
كُلْ شيتاً عكس روحو ونكر سيدها
شَمِس بتجينا بوشيها بقت بتجينا
بي ( ....... ) .
...............
كل شيتاً صِبح بالعكس
عقل الباقي صابو المس
لا خَدّر زرع أو قش
ولا نجض الثمر للحش
...........
كل شيتاً صِبح بالعكس
وطن كامل أزاهو القص
حتي الضُل دخل القش
سماع إضني كورك كش
..............
كل شيتاً صِبح بالغش
العولاق صبح عملاق
والرمة صَبح قِمة
ديك الوادي صار والي
( الباطل )صبح راجل
كمان كاتل
والمهبوش قدل منفوش
ده بس زمن الكضب مفروش
وبيع شرف البنات بقروش
وصوت النخوة صار مقروش
.................
يا مولانا يا (بشبش) أمير الدين
ما جاب المطر بنزين
وما شفناك عدالة ودين
حريقنا وَقَد
حسابنا ولَد
مرقنا نأدب الباطلين
جوه السُلطة رقاصين وهراشين
وبره نِعام
يوم الزَرّة
ما فيكم اسم راجل
وما بتموتو مستورين