مبادرة أبناء البطاحين بدول المهجر
أخي/أختي .. الأعزاء الكرام ..
يسعدنا ويزيد من فخرنا حضورك البهي على صفحات منتداكم العامر بكم بإذن الله تعالى آملين أن تجدوا فيه ما يرقى إلى أذواقكم ويرضي تطلعاتكم.
حبابك عشرة بلا كشرة تفضـل بـدخـول دارك فعز الله مقدارك ولك من إدارة المنتدى فأنت من تساهم برفعة القبيلة والإعلاء من شأنها نتمنى لك وقتا سعـيداً بين أهلك وأخوانك ــ تفضل بالدخول

مجادعة بين الصادق وودشوراني

اذهب الى الأسفل

مجادعة بين الصادق وودشوراني

مُساهمة من طرف أحمد صديق طلحة في الخميس يناير 29, 2015 12:51 pm


هذه المجاراة بين الشاعرين الفذين
الشيخ عبدالله ود حمد ودشوراني والصادق ودآمنة (الصادق ودالحلال كما يحلو لشيخنا عبدالله ودشوراني)

الصادق :
ود شــوراني عيني السهر قبَّـــحَه
ولسنــــات الشمت في يانديم متحَّه
علي عانِس متو اللبى يتلى مني وحجه
سولك منكب جملي أب جريـــداً دحَّه

ودشوراني :
سمح الشوفة روقة الغمدة مني منحَّه
وأنا يا أب آمنه ما خلتلي توبه وصحه
ذوقه غريزة الحب في ضميري زرحه
هجَّام دوره تر عجلو وخبيرتو رفحَّه

الصادق :
بعد الشيب عمتني ونفسي مده قرحَّه
عُقب الليله عــادت للأذى البِسرحَّه
درعات القنوب بعد القلب صـارحه
مجبورين علي نـــار دقمه ندرحَّه

ودشوراني :
قلبي الليــــله منطقة القوافي فتحَّه
فــوق الاريل القمَّح كـــلابي شرحَّه
يا عوض الســلاحو الآن كبادي جرحَّه
خدو وسيم وروبتو على الكتـوف لفحَّه

الصادق :
العين ساقده بلحيل وقاسي نصحَّه
لبيع القامه في سهر الليالي دفحَّه
رب العزه في سابع السماوي رفحَّه
روَّق ذهنها وفطنها مـــاصفحَّه

ودشوراني :
وا أسفاي علي صبري الضِعفلو وشحَّه
سببو العارضه فوق شتم النحاس القحَّه
الخـــــــلاَّقه ليَّن طبعها وسمحَّه
زوله فدورة الــنوق في العجيج قمحَّه

الصادق :
تقيلة المجلس المن القبـــيح تسحَّه
من حر شوقه قلبي ينوح ودوفي إتلحَّه
الخلاني القــــايله فيكي ما بسمحَّه
مقطوع النصــيب بيك نفسو مامتحَّه

ودشوراني :
لهجك كُلمة الحنى السبيطه تفحَّه
أندى نداكي يالشتله أُم أدوباً نحَّه
الخلانه خِلَقِك بالشُكُر نمـــدحَّه
أردافك فلو وقدمـك تقيل ما رحَّه

الصادق :
إنتي فريدة العصر ونخـيل الشبره
شوفتك تذهِب الهم والليالي الغبره
بي فر براطمك وقــامتك المنتبره
أحيتيلي نـــار قُبره البتوقِد كَبره

ودشوراني :
البارح نسيم ريحــاً طلق من جبره
ذكَّر عقلي لي ود العنانــيس هبره
آح من فلانه وجرحها المــا بيبره
قلبي عليها ناح بعد اليقين والصبره

الصادق :
أخُش في مكتب الريِّس وأصُد بالعبره
أنا يا دُقمه طشَّت روحي مي منخبره
الخلاني أتختره النصيـــحه وأبره
ياقوت الحضيري الوازنو مية عبره

ود شوراني :
أرض الله الوسيعه علي بقت منشبره
من لهطي وتِقِربني كل صاحب يبره
عارفك يالظهــورِك مي رديه ودبره
فقدك أحرَّ من سم أب لـــدغةً نبره

الصادق :
راسيه وأديبه وعندك فوق ندايدك فوت
وضربك للعشوق كليح سيوف مو سوط
ناس دُقمه متلي مهددين بالمــــوت
زي كورة الهلال شــاتت قلوبُن شوت

ودشوراني :
مرجان الجواهر وفاخر الـــياقوت
غير حلاته زينة عينو ليَّ تفـــوت
الحويتو جاه بدوي الزيارتو سـبوت
شيخة كُل عارض ومن شلوخه ستوت

الصادق :
ياعوض الجســوم إتعودَّن لبلاهن
ميدان العصُر وعُقب القلوب قالأَّهن
بدر الكون كُبس الظلام ضــواهن
العال والوسط فاز بالجمـال خلاهن

ودشوراني :
سبيك الخيل ظبي القفَّرن بخــلاهن
راح يخرِّب شروط التوبه من منشاهن
فليج بسمها العُقد القلوب حـــلاَّهن
السما والأرض يا دقمه فوقنا كـفاهن

**************
**************
**************

(دا شي براهو دا)

الكــي النجيض فـوق الرقـاب بتخلفـــو
والضيف أب حمل بتكرمو زاملو تعلفو
ممحوق الرجال قولــو البسيهـو أخلفــو
بودة وســعد بخــرب مســـورك يتلفـــو

**************

ماكلـين القـرض دابغنــا في فشفاشنا
وأب ريشاً نفش بندوسو بي دراشــنا
والمو زول فزع حرم نمرقو طراشنا
لا بنحسب عليهو لا بنفرشلو فراشنـا

**************

لويعـــة الــــدود أب لطــامــاً تـــــخ
أقدل يا رجــل فـوق الكبــار وانجـخ
يا أســد العريــن الما انعفرفــك فــخ
يا الموت البخلي الناس تسوي الشخ

**************

الـ كـل بجيــك بتمـــــدلو الكنتـــوش
في مشيـك قلع ماك العـوير بتكـوش
الضيف إن دخل بي طبعتك بتهـوش
عن ساعة الكرم زي التقول مهبوش

**************

وبنتلاقى تاني المقدم الله


_________________
avatar
أحمد صديق طلحة

عدد المساهمات : 34
تاريخ التسجيل : 27/01/2015
العمر : 49

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى